Уладзімер Літвін: “Сябры “Эўранэсту” павіны мець роўны статус”

аўтар Алена Струвэ

Такога меркаваньня прытрымліваецца адзін з падпісантаў распаўсюджанага ў Брусэлі ліста ў падтрымку афіцыйнага беларускага парлямэнту старшыня Вярхоўнай Рады Ўкраіны Ўладзімер Літвін, паведамляе сёньня польскае выданьне Rzeczpospolita.

Напярэдадні кіраўнікі парлямэнтаў пяці краін-удзельніц “Партнэрства” — Армэніі, Азэрбайджану, Грузіі, Малдовы і Ўкраіны — заявілі ў сваім лісьце, што хочуць бачыць у “Эўранэсьце” (парлямэнцкай асамблеі “Партнэрства”) беларускіх дэпутатаў, а не пазапарлямэнцкую апазыцыю, і выступаюць за тое, каб Беларусь мела ў “Эўранэсьце” гэткае ж прадстаўніцтва, што і іх краіны.

У размове з Rzeczpospolita прэсавы сакратар Ўладзімера Літвіна Вольга Чорна патлумачыла, што асноўная ідэя звароту “партнэрскай пяцёркі” — заклік “роўна ставіцца да ўсіх сябраў гэтага праекту. Парлямэнты шасьці краін павінны мець аднолькавы статус. Гэтыя прынцыпы — ключавыя для стварэньня “Эўранэсту”.

Як падаюць польскія СМІ, заява “партнэрскай пяцёркі” зробленая на тле крытычнага дакладу па Беларусі, які падрыхтавала на падставе свайго нядаўняга візыту ў Менск дэлегацыя Эўрапарлямэнту. У гэтым дакумэнце эўрадэпутаты патрабуюць ад беларускіх уладаў вызваленьня палітвязьняў, захаваньня правоў чалавека і правядзеньня свабодных выбараў. У выпадку ігнараваньня Менскам гэтых патрабаваньняў аўтары дакладу лічаць мэтазгодным увядзеньне эканамічных санкцыяў супраць рэжыму Лукашэнкі. Паведамляецца, што даклад будзе абмеркаваны на сэсіі Эўрапарлямэнту на наступным тыдні ў Страсбуры і на яго падставе будзе прынятая рэзалюцыя па Беларусі.

Паводле польскіх выданьняў, сябры Эўрапарлямэнту занепакоеныя, што на заплянаванай на 24—25 сакавіка першай нарадзе ПА “Ўсходняга партнэрства” прадстаўнікі пяці былых савецкіх рэспублік на знак салідарнасьці зь Беларусьсю могуць паспрабаваць правесьці галасаваньне наконт паправак да правілаў “Эўранэсту”. Ня выключана, што гэтую нараду адкладуць да красавіка, пасьля таго як міністры ЭЗ на сваёй сустрэчы абмяркуюць сытуацыю па Беларусі ў сувязі зь нядаўнім перасьледам польскай меншасьці ў гэтай краіне.

Навіна прадстаўленая інфармацыйна-прававым парталам "За Свабоду".net паводле: Радыё Свабода.