аўтар Радыё Свабода
Вэнэсуэла ў траўні 2010 года паставіць у Беларусь пробную партыю нафты ў аб'ёме да 80 тысячаў тон, а да канца года плянуецца паставіць да 4 мільёнаў тон.
Адпаведны кантракт падпісаны 17 сакавіка ў Каракасе пасьля завяршэньня перамоваў прэзыдэнтаў
Беларусі і Вэнэсуэлы Аляксандра Лукашэнкі і Уга Чавэса, паведамляе .
Падчас візыту падпісаны пакет з 22 дакумэнтаў аб супрацоўніцтве ў галіне нафтахіміі, прамысловасьці, будаўніцтва, энэргетыкі, навукі і тэхнікі. Адным з найбольш важных стала заключэньне кантракту на пастаўку нафты з Вэнэсуэлы ў Беларусь. Цягам двух месяцаў плянуецца стварыць сумеснае беларуска-вэнэсуэльскае прадпрыемства па пастаўках нафты, 75% акцый якога будзе належаць
Вэнэсуэле, 25% - Беларусі. Сырая нафта будзе пастаўляцца праз порт Адэсы для наступнай яе перапрацоўкі на Мазырскім НПЗ.
Таксама падпісаны ліцэнзія на права распрацоўкі Беларусьсю газавых радовішчаў і здабычы газу на шасьці радовішчах у Вэнэсуэле і дамова аб заснаваньні сумеснага прадпрыемства па сэрвісных паслугах у нафтаздабычы.
Падчас падпісаньня дакумэнтаў адбылося прамое ўключэньне з газавага радовішча.
Таксама абодва бакі дамовіліся аб пастаўках буйной партыі беларускай тэхнікі. Падпісаны кантракт на будаўніцтва ў Вэнэсуэле заводаў па вытворчасьці тэхнікі МАЗ ды іншых.
Паводле А.Лукашэнкі, гэты візыт стаў гістарычным, бо "Вэнэсуэла ўпершыню выходзіць з нафтай у Эўропу".
Навіна прадстаўленая
інфармацыйна-прававым парталам "За Свабоду".net паводле: Радыё Свабода.
Дадаць каментар
