Суд Кастрычніцкага раёна Менска спыніў адміністрацыйныя справы ў дачыненні да актывістаў «Гавары праўду!» Паўла Сягова і Вячаслава Мухі.
Пра гэта паведаміла іх адвакат Тамара Сідарэнка.
Актывісты былі затрыманыя 5 жніўня ў раёне чыгуначнага вакзала. Супрацоўнікі міліцыі папрасілі іх прад'явіць дакументы, якія засведчваюць асобу. Пашпартоў у іх пры сабе не было, таму супрацоўнікі міліцыі адвялі іх у апорны пункт аховы парадку, дзе правялі агляд рэчаў, сярод якіх выявілі ўлёткі «Гавары праўду!». Пасля заканчэння трох гадзінаў Сягова і Муху адпусцілі, склаўшы на іх пратакол за дробнае хуліганства - нібыта актывісты лаяліся матам.
Аднак суддзя Сяргей Германовіч усумніўся ў тым, што маладыя людзі нецэнзурна лаяліся, паколькі сведак гэтаму не знайшлося, нягледзячы на тое, што затрыманне адбывалася ў шматлюдным месцы. Ён прыняў рашэнне спыніць разгляд адміністрацыйных справаў за адсутнасцю доказаў здзейсненага правапарушэння.
Навіна прадстаўленая
інфармацыйна-прававым парталам "За Свабоду".net паводле: Хартыя'97.
Дадаць каментар
