Андрэа Рыгоні |
«Я заклікаю вас стаць першапраходцамі на шляху ўвядзення мараторыя на пакаранне смерцю ў Беларусі як прамежкавага кроку ў кірунку поўнага яго адмены», — гаворыцца ў адкрытым лісце дакладчыка Парламенцкай асамблеі Рады Еўропы (ПАРЕ) Андрэа Рыгоні на імя старшыні Палаты прадстаўнікоў Вадзіма Папова і старшыні Савета Рэспублікі Генадзя Навіцкага, паведамляе прэс‑служба ПАСЕ.
А.Рыгоні падкрэсліў, што Беларусь зьяўляецца адзінай краінай у Еўропе, дзе дагэтуль захоўваецца пакаранне смерцю.
«Кожнае пакаранне смерцю — гэта ўжо само па сабе занадта шмат, — зазначаецца ў лісце. — Якім жудасным ні было б учыненае злачынства, якімі бясспрэчнымі ні былі б доказы віны, нішто не можа апраўдаць забойства чалавека дзяржавай».
Дэпутат заявіў: ён ганарыцца тым фактам, што ў італьянскай вобласці Таскана, адкуль ён родам, пакаранне смерцю было адменена яшчэ ў 1786 годзе.
«Гэтае рашэнне тлумачыцца тым, што вышэйшая мера пакарання амаральная, яна не прадугледжвае магчымасці перавыхавання правапарушальніка ў грамадстве, не ўтрымлівае людзей ад учынення такіх злачынстваў. Акрамя таго, прывядзенне ў выкананне вышэйшай меры незваротнае і не падлягае выпраўленню ў выпадку судовай памылкі», — падкрэсліў А. Рыгоні.
Ён зазначыў, што на рэферэндуме 1996 года грамадзяне Беларусі выказаліся за вышэйшую меру пакарання. Аднак, падкрэслівае А. Рыгоні, у 2004 годзе Канстытуцыйны суд краіны правёў працу па ацэнцы адпаведнасці Канстытуцыі палажэнняў аб пакаранні смерцю, якія ўтрымліваюцца ў Крымінальным кодэксе. «Суд прыйшоў да заключэння, што шэраг палажэнняў Крымінальнага кодэкса не адпавядаюць Канстытуцыі, і прапанаваў або адмяніць пакаранне смерцю, або ўвесці мараторый на яго выкананне», — нагадаў А. Рыгоні.
«Народным павінна быць у аснове сваёй любое рашэнне, але існуюць пэўныя пытанні, па якіх кіраўніцтву краіны трэба ўзяць на сябе адказнасць першапраходцаў, якія вядуць за сабой людзей і паказваюць ім шлях, — падкрэсліваецца ў лісце. — Пакаранне смерцю зьяўляецца апошняй формай адмаўлення правоў чалавека, якая парушае нормы і каштоўнасці Рады Еўропы. Я прашу вас і Нацыянальны сход Беларусі ўзяць на сябе палітычнае абавязацельства, якое гарантуе, што ніхто больш не будзе пакараны смерцю ў Беларусі».
Навіна прадстаўленая
інфармацыйна-прававым парталам "За Свабоду".net паводле: Наша Ніва.
Дадаць каментар
