Сям'я гомельскага палітыка судзіцца зь міліцыяй

аўтар  Радыё Свабода 25 жніўня Цэнтральны суд Гомеля распачне разгляд пазову Ларысы Варонежцавай да ўправы дазнаньня УУС Гомельскага аблвыканкаму. Жонка грамадзкага актывіста й палітыка Юрыя Варонежцава патрабуе, каб управа вярнула ёй і дзецям асабістыя рэчы й грошы – 4700 даляраў, адабраныя падчас ператрусу кватэры.

18 траўня ў кватэры Юрыя Варонежцава, як і ў дзесяткаў іншых актывістаў грамадзянскай кампаніі «Гавары праўду», былі ўчыненыя ператрусы. Падставай паслужыла пастанова сьледчай Ленінскага РУУС Менску Вікторыі Юхневіч паводле артыкулу 250 Крымінальнага кодэксу — распаўсюд ілжывай інфармацыі пра тавары й паслугі.

У Гомелі ператрусы вялі супрацоўнікі ўправы дазнаньня УУС Гомельскага аблвыканкаму. Яны не тлумачылі, што шукаюць – забіралі кампутары, тэлефоны, відэакамэры, відэакасэты й нават дыскі з запісам групы Ramstein. Асабістыя рэчы й грошы, якія не маюць ніякага дачыненьня да кампаніі “Гавары праўду”, Ларыса Варонежцава й патрабуе праз суд забраць з управы дазнаньня.

Раней у суд зьвяртаўся сам спадар Варонежцаў, але суд вярнуў яму пазоў без разгляду. Пры гэтым палітыку раілі зьвяртацца па абарону сваіх інтарэсаў у пракуратуру, хаця акурат перад напісаньнем пазову ён зьвяртаўся ў Генэральную пракуратуру, але зварот гэты выніку ня меў.

Навіна прадстаўленая інфармацыйна-прававым парталам "За Свабоду".net паводле: Радыё Свабода.