Галоўны рэдактар найбуйнейшай спартовай газэты краіны «Прессбола» Ўладзімер Беражкоў падаў у суд на «Спортивную панораму». Беражкоў спадзяецца ў судзе Цэнтральнага раёну сталіцы абараніць свой гонар, годнасьць і дзелавую рэпутацыю.
У нумары «Спортивной панорамы» ад 13 сакавіка было надрукаванае інтэрвію з дырэктарам НДІ фізычнай культуры і спорту А.Бондарам пад назовам «Сэнсацыя другой сьвежасьці». Сярод іншага суразмоўца адзначыў: «У 1996 годзе, калі Рыжанкова (першы міністар спорту Беларусі — НН) ня стала, пасьля Гульняў у Атланце праходзіў Алімпійскі сход. Беражкоў выбачыўся за жорсткую крытыку гэтага чалавека, прызнаўшы частковую віну ў ягонай сьмерці».
Беражкоў патрабуе: 1) Вызначыць у судовым парадку аўтара артыкулу, які падпісаны «наш кар.», каб прыцягнуць яго да адказнасьці; 2) Абвергнуць у газэце гэтую інфармацыю; 3) Спагнаць з адказчыка 50 мільёнаў рублёў маральнай кампэнсацыі.
Сам Уладзімер Беражкоў так пракамэнтаваў рашэньне зьвярнуцца ў суд:
«Мяне гэта проста абразіла. Каб зьвесьці са мной і «Прессболам» рахункі ў хаду ідзе ўсялякая зброя. Я доўга цярпеў і не паддаваўся на такія рэчы, заплюшчваў вочы, але больш цярпець не магу. Мяне проста гэта кранула і абурыла да глыбіні душы. Проста нельга пераступаць празь сьвятое, праз нябожчыка. Ня важна, рэальна, ці не рэальна выйграць гэты суд. Здаецца, і так відавочна, хто тут мае рацыю. А наколькі хопіць адміністацыйнага рэсурсу ў гэтых чыноўнічкаў, не мая справа», — кажа У.Беражкоў.
Нагадаем, што 28 лютага аргкамітэт НАК пазбавіў «Прессбол» двух акрэдытацый на Алімпійскія Гульні ў Пэкін. Прычынай стаўся артыкул Сьвятланы Парамыгінай «Алімпійская сьметніца». У матэрыяле журналісткі гаворка ішла акурат пра фінансавыя махінацыі ў НДІ фізычнай культуры і спорту.
У падтрымку «Прессбола» ўжо выказаліся некалькі дзесяткаў былых і сёньнішніх мэдалістаў Алімпіядаў і чэмпіянатаў сьвету.
Навіна прадстаўленая
інфармацыйна-прававым парталам "За Свабоду".net паводле: Наша Ніва.
Дадаць каментар
