Беларуская «палата прадстаўнікоў» балюча ўспрыняла рэкамендацыі Еўрапарламента ўключыць у склад Еўранэсту 10 прадстаўнікоў апазіцыі.
Рэкамендацыі дэлегацыі Еўрапарламента ў парламенцкай асамблеі палітыкі ЕЗ «Усходняе партнёрства» (Еўранэст) адносна складу беларускай дэлегацыі ў гэтай структуры неканструктыўныя. Пра гэта ў інтэрв'ю заявіў старшыня камісіі па міжнародных справах і сувязях з СНД «палаты прадстаўнікоў» Сяргей Маскевіч.
10 сакавіка члены дэлегацыі Еўрапарламента ў Еўранэсце прагаласавалі за тое, каб рэкамендаваць Еўрапарламенту запрасіць для ўдзелу ў працы Еўранэста ад Беларусі толькі прадстаўнікоў апазіцыі і грамадзянскай супольнасці. Чакаецца, што пытанне пра склад беларускай дэлегацыі ў Еўранэсце будзе разгледжана ў першай палове красавіка.
«У мяне стаўленне да рэкамендацый адмоўнае. Гэта неканструктыўны крок. Але яны былі цалкам прадказальныя, зыходзячы з папярэдніх заяў еўрадэпутатаў», - сказаў Маскевіч.
Беларускі «дэпутат» хоча, каб Еўрапарламент звяртаў больш увагі на пазіцыю краін СНД, якія ўдзельнічаюць ва Усходнім партнёрстве.
«Кіраўнікі парламентаў Азербайджана, Арменіі, Грузіі, Малдовы і Украіны адзіныя ў сваёй пазіцыі, што Нацыянальны сход павінен быць прадстаўлена ў Еўранэсце нароўні з усімі. Дэлегацыя Еўрапарламента мае супрацьлеглае меркаванне. Напэўна, непазбежныя разыходжанні пры прыняцці і іншых рашэнняў удзельнікамі Еўранэста», - лічыць Маскевіч.
На яго думку, рэкамендацыі дэлегацыі Еўрапарламента ў Еўранэсце «не спрыяюць аптымальнаму і канструктыўнаму супрацоўніцтву Беларусі і Еўразвяза».
Як раней паведамляў сайт charter97.org, Еўрапарламент парэкамендаваў не запрашаць «палатачнікаў» у склад ПА «Усходняга партнёрства». Рашэнне пра склад беларускай дэлегацыі ў парламенцкай асамблеі палітыкі ЕЗ «Усходняе партнёрства» (Еўранэст) адкладзена на месяц. Аднак 10 сакавіка сябры дэлегацыі Еўрапарламента ў Еўранэсце прагаласавалі за тое, каб рэкамендаваць Еўрапарламенту запрасіць для ўдзелу ў працы Еўранэста ад Беларусі толькі прадстаўнікоў апазіцыі і грамадзянскай супольнасці.
Навіна прадстаўленая
інфармацыйна-прававым парталам "За Свабоду".net паводле: Хартыя'97.
Дадаць каментар
