Кіраўнік МЗС Беларусі ў інтэрв'ю аўстрыйскаму выданню «Der Standard» заявіў, што «ёсць розныя грамадствы, розныя звычаі, традыцыі».
Сяргей Мартынаў адказаў на пытанні «Der Standard» у рамках Мюнхенскай канферэнцыі па пытаннях бяспекі. Тэкст інтэрв'ю на расейскай мове падае газета .
- Якія высновы вы зрабілі з канфлікту аб мытных пошлінах і цане на нафту, які працягваецца некалькі месяцаў, з бліжэйшым партнёрам Расеяй?
- Шэраг высноваў ужо зроблены. Мы павінны прыкласці яшчэ больш намаганняў для таго, каб забяспечыць энергетычную бяспеку нашай краіны. Неўзабаве ў нас будзе атамны рэактар, мы інвестуем у гідраэнергетыку, вугальную энергетыку і аднаўляльныя крыніцы энергіі. Таксама павінны зрабіць высновы і краіны, якія знаходзяцца на іншым канцы магістральнага газаправода: Беларусь - вельмі надзейны транзітны партнёр. Падчас вельмі цяжкіх перамоваў мы ніколі не дапускалі магчымасць выкарыстання транзітнага газаправода ў сваіх інтарэсах. Еўрапейцы павінны гэта зразумець і прызнаць.
- Як далёка вы гатовыя пайсці насустрач Еўропе ў палітычных рэформах, каб зблізіцца ў гандлёвых адносінах і выкарыстоўваць перавагу ў палітыцы добрасуседства?
- Мы не павінны блытаць рынкавыя і палітычныя рэформы. Гэта дзве розныя рэчы. Мы гатовыя прысутнічаць на рынку Еўропы. І, я спадзяюся, палітыка не будзе нам у гэтым перашкаджаць. Але, што тычыцца вашага пытання, мы ўжо знаходзімся ў палітычным дыялогу з Еўрапейскім Звязам. І потом, вы павінны разумець, сапраўдная палітычная сітуацыя ў Беларусі нашмат, нашмат лепш, чым гэта прадстаўлена ў медыя. Існуюць стэрэатыпныя ўяўленні і інтэлектуальная інертнасць, якія не супадаюць з рэальнасцю ў Беларусі. Кожны, хто прыязджае ў Беларусь, як правіла, здзіўлены тым, што ён тут бачыць і знаходзіць. Вядома, нашае грамадства павінна развівацца далей. Але гэта мы робім не наспех і не ў сувязі з патрабаваннямі ЕЗ.
- Вы чулі словы міністра замежных спраў Нямеччыны Гіда Вестэрвелена аб тым, што патрабаванні да Ірана паважаць правы чалавека нельга разглядаць як умяшальніцтва ва ўнутраныя справы краіны. Вы згодныя з гэтым?
- Правы і годнасць чалавека неабходна паважаць. Гэта тычыцца ўсіх. Але для гэтага няма ніякіх універсальных рэцэптаў. Ёсць розныя грамадствы, розныя звычаі, традыцыі. І яны таксама павінны паважацца. Гэта павінна быць зразумела. Мы надаем усё больш увагі пытанню павагі чалавечай годнасці ў нашай краіне.
- ЕЗ працягнуў санкцыі супраць Беларусі - галоўным чынам гэта тычыцца паездак высокапастаўленых прадстаўнікоў ураду. Але вы зараз знаходзіцеся тут. Як вы растлумачыце гэтую сітуацыю?
- Гэта дастаткова дзіўная сітуацыя для абодвух бакоў. Няма сэнсу працягваць санкцыі і потым іх прыпыняць. Канчатковы вынік будзе толькі негатыўным, людзі ў Беларусі адмоўна паставяцца да гэтага. Гэта ніяк не партнёрскія адносіны. На працягу 15 гадоў людзі маглі выязджаць у Польшчу і Літву без візы. Што ж здарылася сёння? З'явілася новая сцяна ў Еўропе.
- Нядаўна Еўропа адсвяткавала 20-годдзе падзення сцяны і канец камунізму. Але Беларусь засталася асобым выпадкам. Якой Вы бачыце Беларусь праз 20 гадоў?
- Нашыя чаканні вызначае геаграфія. Беларусь знаходзіцца паміж двума ўплывовымі цэнтрамі - ЕЗ і Расеяй. Выжыць паміж двума гігантамі - заўсёды не проста. Па-першае, мы хацелі б выжыць, па-другое, квітнець, і па-трэцяе,-у выдатных адносінах з абодвамі бакамі. Мы не з’яўляемся кандыдатамі ў ЕЗ, мы не будзем рухацца разам з Расеяй. Мы будзем заставацца суверэннай дзяржавай паміж двума гігантамі. Мы хочам быць важнай дэталлю ў гэтай вялікай машыне - Еўрапейскім кантыненце.
Навіна прадстаўленая
інфармацыйна-прававым парталам "За Свабоду".net паводле: Хартыя'97.
Дадаць каментар
