аўтар Радыё Свабода
Лідэр руху "За свабоду" Аляксандар Мілінкевіч заклікаў Палату прадстаўнікоў прыняць папраўку ў Выбарчы кодэкс, якая гарантуе прадстаўнікам кандыдатаў удзел у падліку галасоў.
Ліст А. Мілінкевіча адрасаваны старшыні Палаты прадстаўнікоў Уладзімеру Андрэйчанку, паведамляе прэсавая служба Руху.
Аляксандар Мілінкевіч нагадвае ў сваім звароце, што ў краіне па-ранейшаму існуе постымпэрская пагроза страты незалежнасьці. Каб абараніць сувэрэнітэт і разьвіваць эканоміку, краіне неабходна сыстэмнае рэфармаваньне ў палітычнай, эканамічнай і сацыяльнай сфэрах. Галоўным партнэрам у пераўтварэньнях, паводле лідэра руху "За свабоду", можа і гатовы стаць Эўрапейскі Зьвяз.
Аляксандар Мілінкевіч заклікае праявіць волю да выразных і маштабных пераменаў. Ён прапануе Палаце прадстаўнікоў на пазачарговай сэсіі 7 верасьня прыняць папраўку ў Выбарчы кодэкс, якая будзе гарантаваць кожнаму незалежнаму кандыдату ў прэзыдэнты наяўнасьць яго прадстаўнікоў у складзе выбарчых камісіяў усіх узроўняў.
"Так робіцца ва ўсіх цывілізаваных краінах, нават у суседніх Украіне і Расіі. Гэта можа стаць першым крокам па дэмакратызацыі палітычнага жыцьця. Сумленны і сумесны падлік галасоў — перадумова прызнаньня выбараў за мяжой і даверу да іх вынікаў саміх беларусаў", — падкрэсьлівае Аляксандар Мілінкевіч.
Навіна прадстаўленая
інфармацыйна-прававым парталам "За Свабоду".net паводле: Радыё Свабода.
Дадаць каментар
