22.03.2008 16:40
У Гомелі міліцыя распачала вечаровыя абыходы кватэраў апазыцыйных палітыкаў і дэмакратычных актывістаў.
Міліцыянты патрабуюць падпісаць абавязацельства ня ўдзельнічаць у вулічных акцыях да Дня Волі.
Распавядае сябра Хрысьціянска-кансэрватыўнай партыі БНФ Уладзімер Шыцікаў:
“Учора пасьля 23 гадзін, калі я ўжо спаў, мяне разбудзіла жонка. Сказала, што да мяне прыйшоў участковы. Я выйшаў са спальні. Старшы лейтэнант міліцыі патрабаваў, каб я даў падпіску, што ня буду ўдзельнічаць у палітычных акцыях. Я яго выгнаў, параіўшы ўзяць Канстытуцыю і хаця б патрымаць яе ў руках, пачытаць, што там напісана.
Гэта ўжо кепская традыцыя, што перад Днём Волі мяне затрымліваюць – то я нібыта лаюся матам, то друкую 10-тысячныя беларускія купюры. Карацей, учыняюць усе магчымыя правакацыі, саджаюць за краты, каб ня браў удзелу ў акцыях апазыцыі”.
Наведваліся міліцыянты і на кватэру рэгіянальнага каардынатара стваранай сацыял-дэмакратычнай партыі Народная Грамада Юрася Захаранкі:
“Да мяне таксама прыходзілі міліцыянты з Савецкага райаддзелу міліцыі. Пагражалі адміністрацыйнай адказнасьцю, патрабавалі падпісаць абавязацельства, што я нікуды не пайду на Дзень Волі. Я лічу, што міліцыя такімі дзеяньнямі спрабуе стрымаць незадаволенасьць у грамадзтве пануючым рэжымам”.
Двое міліцыянтаў прыходзілі вечарам дамоў і да старшыні гарадзкой арганізацыі АГП Андрэя Толчына. Таксама патрабавалі падпісацца, што ён ня будзе удзельнічаць у несанкцыянаваных масавых акцыях.
Гаворыць спадар Толчын:
“Мяне гэта вельмі зьдзівіла, і я запытаўся, на якой падставе яны гэта робяць. Не пытаюць, напрыклад, у суседа. Адказу міліцыянты на гэта не далі. Тады я запытаўся: “Скажыце, калі ласка, а хто даў такі загад – ён парушае маё канстытуцыйнае права?”. Мне адказалі: “Гэта таямніца”. Але гэта яшчэ і пацьверджаньне таго, што ў нас насуперак закону вядзецца палітычны сыск. Я маю іншыя погляды на разьвіцьцё грамадзтва. Дзяржава за мной сочыць, іншадумства перасьледуецца”, – сказаў з нагоды вечаровых візытаў міліцыі да актывістаў сябра АГП Андрэй Толчын.
Навіна прадстаўленая
інфармацыйна-прававым парталам "За Свабоду".net паводле: Радыё Свабода.
Дадаць каментар
