Міліцыя зацікавілася швейнымі машынкі апазіцыянераў

3 сакавіка віцебская міліцыя правяла допыт Сяргея Каваленкі, які вывесіў бел-чырвона-белы сцяг у цэнтры горада, а таксама яго жонкі.

Жонка Сяргея Каваленкі ў адпаведнасці з парадай адваката выкарыстоўвала сваё права не даваць паказанні, якія могуць быць скарыстаныя супраць мужа, перадае .

Алена Каваленка распавяла, што адказала ўсяго на адно пытанне следчага з упраўлення папярэдняга расследавання УУС Віцебскага аблвыканкама Андрэя Баранава. Яго цікавіла, ці ёсць у іх дома швейная машынка.

Жонка апазіцыянера сказала, што няма, хоць пытанне яе здзівіла: міліцыянты праводзілі ператрус у іх дома, калі Сяргея Каваленку затрымалі за сцяг. Пытанне пра швейную машынку тады не ўзнікала - канфіскавалі толькі некалькі незалежных друкаваных выданняў.

Алена Каваленка мяркуе, што следчы спрабуе высветліць, адкуль узяўся бел-чырвона-белы сцяг, вывешаны яе мужам 7-га студзеня, і ці можна знайсці верагодных саўдзельнікаў.

Разам з жонкай на допыт выклікалі і самога Сяргея Каваленку. Допыт пачаўся раніцай з перапынкам на абед і працягнецца пасля 14 гадзін дня. Апазіцыянера абвінавачваюць адразу па двух артыкулах Крымінальнага кодэксу - за грубае парушэнне грамадскага парадку і супраціў прадстаўнікам органаў унутраных спраў. За гэта Сяргею Каваленку пагражае да 6 гадоў турэмнага зняволення.

Нагадаем, што 7 студзеня на галоўнай ёлцы горада з'явіўся бел-чырвона-белы сцяг. За гэта быў затрыманы 34-гадовы актывіст Кансерватыўна-Хрысціянскай партыі БНФ Сяргей Каваленка. Пастановай пракурора Віцебска 10 студзеня апазіцыянер быў змешчаны ў СІЗА на два месяцы. У дачыненні да яго ўзбуджаная справа па артыкуле 339, частка 2 КК (хуліганства, здзейсненае паўторна, альбо групай асобаў, альбо звязанае з супрацівам асобе, якая спыняе хуліганскія дзеянні, альбо спалучанае з прычыненнем менш цяжкага цялеснага пашкоджання). 12 студзеня апазіцыянер быў вызвалены пад падпіску аб невыяздзе.

Пасля гэтага ў Віцебску пачаліся арышты і ператрусы ў дамах апазіцыянераў.

Навіна прадстаўленая інфармацыйна-прававым парталам "За Свабоду".net паводле: Хартыя'97.