аўтар Радыё Свабода
Кіраўнік Беларусі Аляксандар Лукашэнка працуе ў Менску і сёньня правёў сустрэчы з віцэ-прэм’ерам Андрэем Кабяковым і намесьнікам кіраўніка прэзыдэнцкай адміністрацыі Леанідам Анфімавым. Гаворка ішла пра лёс мытнага саюзу і ўдзелу ў ім Беларусі.
Пра гэта паведаміў карэспандэнту Свабоды кіраўнік прэзыдэнцкай прэс-службы
Павал Лёгкі.
Ён зьняпраўдзіў пра тое, што А.Лукашэнка нібыта знаходзіцца зь візытам у Вэнэсуэле.
“Аляксандар Рыгоравіч у Менску. Сёньня ў навінах паглядзіце”, - сказаў П.Лёгкі.
Выступаючы ў сераду ў Гарадзкім тэатры Каракасу з нагоды Дня мэдыкаў, прэзыдэнт Вэнэсуэлы
Уга Чавэс паведаміў, што ў найбліжэйшым часе яго краіну наведаюць кіраўнікі розных дзяржаваў сьвету, і сярод іх першым будзе візыт у Вэнэсуэлу прэзыдэнта Аляксандра Лукашэнкі разам з дэлегацыяй ягонага ўраду.
Ён падкрэсьліў, што з гэтай краінай Усходняй Эўропы праводзяцца важныя двухбаковыя праекты:
"Беларусь – краіна высокага тэхналягічнага прагрэсу, мы пачынаем разьмяшчэньне заводу грузавых аўтамабіляў і трактароў, мы распрацоўваем такі праект. Акрамя таго, завод аптычнага абсталяваньня ад мікраскопаў да тэлескопаў”, - цытуе Чавэса афіцыйнае вэнэсуэльскае агенцтва Agencia Bolivariana de Noticias.
Напярэдадні А.Лукашэнка адмовіўся ад запрашэньня ўзяць удзел ва ўрачыстасьцях у Вільні з нагоды 20-годзьдзя аднаўленьня незалежнасьці Літвы. Замест кіраўніка Беларусі ў Літву прыехаў віцэ-прэм’ер Віктар Бура.
Навіна прадстаўленая
інфармацыйна-прававым парталам "За Свабоду".net паводле: Радыё Свабода.
Дадаць каментар
