Сёньня ў полацкім гарадзкім судзе пачынаецца суд над Касей Салаўёвай. Дзяўчыну абвінавачваюць ва ўдзеле ў незарэгістраванай арганізацыі “Малады фронт”. Ёй пагражае да двух гадоў зьняволеньня.
Кася Салаўёва лічыць, што яе ня будуць караць пазбаўленьнем волі. “У нас не тая абстаноўка ў краіне, каб рызыкаваць і саджаць чалавека проста ні за што. Ня думаю, што ўлады захочуць псаваць свае адносіны з Захадам. Таму лепей будзе даць мне штраф і адпусьціць. Бацькі падтрымліваюць. Хвалююцца, напэўна, але яны мяне так выхоўвалі, што годнасьць даражэйшая за жыцьцё”, - кажа Кася ў інтэрвію “Радыё Свабода”.
Яна таксама прыгадала, што восем актывістаў “Маладога фронту”, якіх судзілі ў Менску, Салігорску, Нясьвіжы і Баранавічах пакаралі штрафамі за ўдзел у незарэгістраванай арганізацыі. І толькі аднаго маладафронтаўца, цяперашняга лідэра “Маладога фронту” Зьмітра Дашкевіча, пакаралі зьняволеньнем на паўтара года. Кася стала дзясятай па ліку актывісткай арганізацыі, якую прыцягнулі да крымінальнай адказнасьці за ўдзел у “Маладым фронце”.
Летась 29 лістапада супраць Касі распачалі дзьве крымінальныя справы – за ўдзел у незарэгістраванай арганізацыі і за зьнявагу дзяржаўных сымбаляў. У той жа дзень супраць яе распачалі й адміністрацыйную справу за графіці палітычнага зьместу (надпісы былі зробленыя на будынку выканкаму). 5 сьнежня Касю адлічылі з полацкага дзяржаўнага ўнівэрсытэту з фармулёўкай “за акадэмічную непасьпяховасьць”.
Тым часам, у полацкі гарадзкі суд зьбіраюцца людзі з розных рэгіёнаў. Сярод іх актывісты “Маладога фронту”, палітыкі, грамадзкія дзеячы і сябры іншых моладзевых арганізацый, у тым ліку, адзін з лідэраў грамадзянскай кампаніі “Эўрапейская Беларусь” Мікола Статкевіч, які ўпэўнены, што падтрымаць “Малады Фронт” – пытаньне гонару ўсіх палітыкаў.
“”Малады фронт” апынуўся перад нападам з боку ўладаў. Гэтая кампанія супраць яго цягнецца ўжо амаль два гады. Я думаю, што пытаньне гонару ўсіх беларускіх палітыкаў аказаць падтрымку і быць салідарнымі з “Маладым фронтам”, - кажа Мікола Статкевіч.
Актывіста “Маладога фронту” Зьмітра Хведарука летась суд Савецкага раёну Менску аштрафаваў за ўдзел у незарэгістраванай арганізацыі. Яго судзілі разам з чатырма паплечнікамі.
“Безумоўна, будзем падтрымліваць Касю, бо такая шчырая грамадзянская салідарнасьць можа дапамагчы ня толькі адстаяць Касю, каб не было больш перасьледу, але й паказаць, што мы падтрымліваем Касю, падтрымліваем чалавека, бо чалавек – самае галоўнае для нас”, - падкрэсьліў Зьміцер Хведарук.
Суд над Касей Салаўёвай пачынаецца ў 10.30.
Навіна прадстаўленая
інфармацыйна-прававым парталам "За Свабоду".net паводле: Хартыя'97.
Дадаць каментар
