Кіраўніцтва Эўрапарлямэнту адклала дату паседжаньня Эўранэсту з-за Беларусі

аўтар  Радыё Свабода

Заплянаванае на 24 сакавіка першае паседжаньне Парлямэнцкай Асамблеі (Эўранэст) перанесенае. Новая дата пакуль не ўстаноўленая.

Як паведаміла польскае інфармацыйнае агенцтва , рашэньне адносна таго, хто ад Беларусі павінен заняць 10 месцаў у Эўранэсьце – прадстаўнікі беларускага Нацыянальнага сходу альбо дэмакратычная апазыцыя – мусіла зацьвердзіць сёньня Канфэрэнцыя старшыняў Эўрапарлямэнту. У Канфэрэнцыі прадстаўленыя сьпікер Эўрапарлямэнту, а таксама старшыні палітычных групаў (фракцый). Аднак, у выніку адсутнасьці сярод парлямэнтароў агульных падыходаў і кампрамісаў, Канфэрэнцыя пастанавіла, што разгляд гэтага пытаньня адбудзецца не раней як праз месяц.

Паводле прадстаўніка парлямэнцкага Левага дэмакратычнага альянсу Багуслава Ліберадзкага, галасавалі па-рознаму. Сацыялісты настойвалі на тым, каб да Беларусі ў Эўранэсьце ўжываліся тыя ж правы, што і дачыненьні да іншых пяці краін-удзельніц. Гэта значыць, усе 10 месцаў у ПА павінны заняць прадстаўнікі Нацыянальнага сходу. Тым больш, што такое патрабаваньне ў сваім адкрытым лісьце выказалі і кіраўнікі парлямэнтаў Азэрбайджану, Армэніі, Грузіі, Малдовы і Ўкраіны. Кансэрватары выступалі за тое, каб усе месцы занялі прадстаўнікі дэмакратычнай апазыцыі.

Сам Ліберадзкі і некаторыя іншыя былі за тое, каб беларускія месцы былі разьмеркаваныя паміж дэпутатамі і апазыцыянэрамі.
"Мы лічым, што было б лепш пачаць працу з беларускім парлямэнтарамі, чым ставіць пад сумнеў увесь праект Эўранэсту”, падкрэсьліў парлямэнтар ад Левага дэмакратычнага альянсу.

Тым часам старшыня Эўрапарлямэнту Ежы Бузэк, паводле крыніцы РАР, сказаў на паседжаньні Канфэрэнцыі наступнае: “З майго ўласнага досьведу ў “Салідарнасьці” запрашаць прадстаўнікоў улады “ня ёсьць добра”.

Навіна прадстаўленая інфармацыйна-прававым парталам "За Свабоду".net паводле: Радыё Свабода.