Грыбаўскайтэ запрасіла Лукашэнку на ўрачыстасьці ў Вільню

аўтар  Радыё Свабода
Прэзыдэнт Літвы Даля Грыбаўскайтэ запрасіла Аляксандра Лукашэнку на ўрачыстасьці прымеркаваныя да Дня незалежнасьці Літвы.

Пра гэта са спасылкай на крыніцы ў літоўскім МЗС перадала тэлевізійная праграма .

Урачыстыя сьвяткаваньні 20-й гадавіны аднаўленьня незалежнасьці Літвы адбудуцца 11 сакавіка ў Вільні.

Паведамляецца, што літоўскія дыпляматы ўжо перадалі Лукашэнку асабістае запрашэньне ад яго літоўскай калегі. Адказ беларускага кіраўніка чакаецца ў панядзелак.

На мінулым тыдні афіцыйная Вільня вітала крок Генэральнай пракуратуры Беларусі, якая на просьбу літоўскага боку дапытала генэрала Ўладзімера Ўсхопчыка і перадала пратакол допыту літоўскаму боку. Усхопчык камандаваў Віленскім гарнізонам у часе падзеяў 13 студзеня 1991 году, калі савецкія войскі накіравалі танкі на дэманстрантаў у Вільні, якія патрабавалі незалежнасьці. У выніку супрацьстаяньня тады загінула 14 чалавек, каля тысячы атрымалі траўмы рознай цяжкасьці.

Даля Грыбаускайтэ дала пазытыўную ацэнку гэтаму жэсту афіцыйнага Менску. Паводле літоўскіх СМІ, супраца беларускіх уладаў у справе Ўсхопчыка і стала падставай для запрашэньня Лукашэнкі ў Вільню.

Навіна прадстаўленая інфармацыйна-прававым парталам "За Свабоду".net паводле: Радыё Свабода.