У Менску, у Парку Дружбы народаў, пачаўся мітынг у падтрымку аб'яднаньня народаў Беларусі і Расеі. На акцыю сабралася пакуль 30-40 чалавек. Сярод іх: браты Скрабцы, генерал Валер Фралоў, намесьнік старшыні Партыі камуністаў Беларусі Алена Скрыган ды інш.
Удзельнікі акцыі трымаюць расьцяжкі: "Свабоду Казуліну" і "Россия, дай отдохнуть от АГЛ". Ёсьць бел-чырвона-белыя сьцягі з ружай (сымболіка БСДП) і расейскія дзяржаўныя.
Грае музыка. Гучаць песьні з рэпэртуара Віктара Цоя і "Акіяна Эльзы". Традыцыйнае пытаньне журналістаў: "А чаму не даюць цукерак?", застаецца пакуль без адказу :)
На акцыі прысутнічае таксама паўтара дзясятка журналістаў.
Настрой ва ўсіх бадзёры, пазытыўны.
Нагадаем, што пасьля мітынгу павінен пачацца канцэрт у знак салідарнасьці з палітвязьнямі.
***
18:35 Падышоў міліцыянт і папрасіў згарнуць расьцяжкі і схаваць сьцягі, паколькі яны не перадаюць сутнасьці заяўленага мерапрыемства -- яднаньня з Расеяй. Што праўда, расьцяжкі схавалі.
Зьявіўся Сяргей Скрабец са сьцягам Тыбэту.
18:38 Пачаўся мітынг. Людзей паболела. За выняткам журналістаў, у Парку Дружбы народаў -- 50 чалавек. Але сярод іх хапае мінакоў, якія зь цікавасьцю назіраюць за сюжэтам акцыі.
18:44 Першым выступіў Сяргей Скрабец. Ён працытаваў спачатку словы БТ, якое колісь сказала, што ў Беларусі няма разумных палітыкаў, якія выступаюць за інтэграцыю з Расеяй.
«Няпраўда, — сказаў Скрабец, — яны тут, на гэтым мітынгу».
Таксама ён прапанаваў Лукашэнку і ўраду выбачыцца перад народам Расеі, перад Пуціным і Мядзьведзевым за той, бруд, які ліецца на Расею з прапагандысцкіх каналаў.
Генэрал Валер Фралоў у сваім выступе згадаў, як добра жылося беларусам пры СССР, што БССР была тады ў прывілеяваным становішчы. А незалежнасьць звалілася ў 1991 г. нечакана і дзякуючы Расеі, — сказаў генэрал. Ён таксама заўважыў, што летась на аналягічным мітынгу было толькі 12 чалавек. "Цяпер нас у некалькі разоў болей, а пра год будзе яшчэ болей".
18:51Генэрал Бокаў, што выступаў наступным, адразу заявіў, што яму сорамна выступаць пад бел-чырвона-белымі сьцягамі, што лунаюць ля сцэны.
"Гэта сьцягі паліцаяў і здраднікаў", — заявіў удзельнік Вялікай Айчыннай вайны. Ён заклікаў маладых людзей пакінуць сцэну з нацыянальнымі штандарамі. Моладзь у адказ гукае: "Ганьба" і "Жыве Беларусь", але сыходзіць.
Генэрал Бокаў таксама назваў сёньняшню нацыянальную апазыцыю эсэсаўскімі недабіткамі і заявіў, што Партыя камуністаў беларуская выступае за інтэграцыю з Расеяй.
Генэрал Фралоў паспрабаваў выбачыцца перад моладзьдзю за зьнявагу нацыянальных сымбаляў.
Журналісты паціху пачынаюць пакідаць "мерапрыемства".
Навіна прадстаўленая
інфармацыйна-прававым парталам "За Свабоду".net паводле: Наша Ніва.
Дадаць каментар
