Брат зрынутага прэзідэнта Кыргызстана Курманбека Бакіева знаходзіцца ў Беларусі. З такой заявай выступіў кіраўнік Дзяржслужбы нацыянальнай бяспекі Кыргызстана Кенешбек Душабаеў 5 жніўня на прэс-канферэнцыі ў Бішкеку.
«Жаныбек Бакіеў, паводле нашых звестак, знаходзіцца каля старэйшага брата — былога прэзідэнта Кыргызстана», — заявіў Душабаеў інфармацыйнаму агенцтву 24.kg.
Гэта ўжо не першая падобная заява ўлад Кыргызстана. Нагадаем, 7 ліпеня віцэ-прэм’ер часовага ўрада Азібек Бекназараў паведаміў журналістам, што афіцыйны Бішкек звярнуўся у Інтэрпол з просьбай праверыць звесткі аб знаходжанні Жаныбека Бакіева на тэрыторыі Беларусі. «Кажуць, Жаныбека Бакіева бачылі на прэс-канферэнцыі Курманбека Бакіева», — дадаў ён.
У Генеральнай пракуратуры Беларусі інфармацыю аб месцазнаходжанні брата Курманбека Бакіева БелаПАН каментаваць не сталі.
***
Курманбек Бакіеў з неафіцыйнай жонкай і двума малалетнімі дзецьмі знаходзіцца ў Беларусі з 19 красавіка па запрашэнні Аляксандра Лукашэнкі. За гэты час ён тройчы даваў прэс-канферэнцыі. На апошняй, 23 чэрвеня, Бакіеў паведаміў: «Усе мае браты, за выключэннем аднаго, знаходзяцца за межамі Кыргызстана, дзе — я пакуль не буду гаварыць».
У маі кіраўнік часовага ўрада Роза Атунбаева падпісала дэкрэт аб пазбаўленні Курманбека Бакіева прэзідэнцкай недатыкальнасці на падставе крымінальнай справы, па якой ён абвінавачваецца ў арганізацыі забойстваў і злоўжыванні службовым становішчам. Генпракуратура Кыргызстана звярталася ў Генпракуратуру Беларусі з запытам аб выдачы Бакіева, але атрымала адмову.
Браты Бакіева абвешчаныя ў вышук па абвінавачанні ва ўчыненні цяжкіх злачынстваў, у тым ліку забойстваў.
Паводле звестак кіргізскіх крыніц, у Курманбека Бакіева пяцёра братоў. Вышэйзгаданы Жаныбек Бакіеў да змены ўлады займаў пост кіраўніка Службы дзяржаўнай аховы. Высокія дзяржаўныя пасты таксама займалі Каныбек і Марат Бакіевы. Яшчэ два браты Бакіева, Ахмат і Адыл, займаліся бізнесам.
Дадаць каментар
