11.04.2008 17:09
Аддзяленьне акрабатыкі магілёўскай спартовай школы “Багіма” выселена са спартовай залі. Цяпер тут рыхтуецца да Алімпіяды ў Пэкіне батутыстка Натальля Пятрэня.
Навучэнцы школы, бацькі і трэнэры незадаволеныя. “Гэты канфлікт справакавалі чыноўнікі ад спорту”, — лічаць яны.
“Нам казалі: патрывайце да верасьня, скончыцца рамонт — і ўсіх туды пусьцяць. Але калі скончыўся рамонт, мы засталіся на вуліцы”, – расказвае трэнэрка акрабатаў Натальля Зубарава.
Суразмоўца даводзіць, што яны цяпер мусяць трэніравацца ў цеснай і непрыстасаванай спартовай залі сярэдняй школы № 6:
“Нам патрабуецца стандартны дыван адзінаццаць на адзінаццаць мэтраў, а тут мы трэніруемся на дыване памерам чатыры на шэсьць. Дзяцей дужа шмат. Нязручна працаваць, бо тут і малыя, і каманды трэніруюцца. Нашы вынікі нікога не задавальняюць. Усё адно мы дрэнна працуем, нам кажуць так”.
Пра непрыдатнасьць памяшканьня кажуць і дзеці, што займаюцца акрабатыкай.
Нельга адразу й лядовыя палацы будаваць і іншае падтрымліваць.
“Калі мы езьдзім у розныя гарады, мы бачым вялікія залі й губляемся. Дужа цяжка займацца, бо тут замала месца. Мы ніяк ня можам падзяліць з другой групай залю”.
Дырэктар спартовай школы “Багіма” Васіль Шарахоўскі паведаміў “Свабодзе”, што ў Магілёве няма ніводнай спэцыялізаванай гімнастычнай залі. Паводле ягоных словаў, у абласным цэнтры нельга правесьці афіцыйныя спаборніцтвы гімнастаў.
У Магілёўскім аблвыканкаме пацьвердзілі зьвесткі, што рамонт у залі, дзе раней займаліся акрабаты, скончаны. Але, як удакладняе прадстаўнік управы спорту й турызму аблвыканкаму Аляксандар Гагіеў, там цяпер трэніруецца толькі Натальля Пятрэня. “Такім было патрабаваньне Нацыянальнага алімпійскага камітэту”, — падкрэсьлівае суразмоўца.
“Усе ўмовы мы павінны былі стварыць для Пятрэні. Было пажаданьне і галоўнага трэнэра па скачках на батуце, і міністэрства спорту. Купілі новыя батуты. Там проста месца для акрабатаў не засталося”.
Паводле спадара Гагіева, рамантавалі спартовую залю за кошт абласнога бюджэту і за сродкі магілёўскай вучэльні алімпійскага рэзэрву.
А які лёс чакае акрабатаў? Працягвае Аляксандар Гагіеў:
“На наступны год заплянаванае будаўніцтва магілёўскім гарвыканкамам гімнастычнага модуля. Няма ў нас на сёньняшні дзень залі для гімнастаў нармальнай, для акрабатаў. Нельга адразу й лядовыя палацы будаваць і іншае падтрымліваць”.
Раней “Свабода” паведамляла, што на будаўніцтва ў Магілёве лядовага палаца пайшло гэтулькі дзяржаўных сродкаў, што давялося спыніць фінансаваньне рамонту і рэканструкцыі іншых спартыўных збудаваньняў як у абласным цэнтры, так і ў рэгіёне.
Навіна прадстаўленая
інфармацыйна-прававым парталам "За Свабоду".net паводле: Радыё Свабода.
Дадаць каментар
